الطفل الدارج و الاطفال الاكبر كمان محتاجين يحسوا ان الام و الاب بيقوموا بدور "القائد" فى حياتهم ومحتاجين "حدود" و اضحة للسلوك. الاطفال الدارجين دايما بيختبرونا عشان يعرفوا فين الحدود ؟ الاختبار دة هو طريقتهم فى طلب مساعدة و طلب اجابة واضحة على سؤال الطفل بيسألهولنا بس بطريقته هو.
الطفل لما بيفتقد صورة القائد الى محتاجها ولما مش بيلاقى اجابة و اضحة و صريحة على اختباره للام, بيفقد احساسه بالامان و بيدخل فى دائرة مفرغة من الاختبار بتظهر على شكل طفل متمرد صعب الارضاء.
طيب ايه هى الحدود المناسبة للطفل من عمر سنة تقريبا او اقل ؟
- الحدود المتعلقة بأمان الطفل
- عدم الاعتداء على طفل اخر باى طريقة
- بعض القواعد الخاصة بالنظافة و النظام و عدم التخريب بما يتناسب مع سنه و بدوت تفريط او افراط
- اداب التعامل مع الاكبر سنا ايضا بما يتناسب مع سنه و بدون تفريط او افراط
- آداب عامة للسلوك زى آداب الطعام و استخدام الحمام والنوم غيره
- توجد اشياء من حق الطفل يقررها ..زى هياكل ولا لا؟ و هياكل اد ايه؟ انا باعرض عليه طعام صحى و متنوع طول الوقت و اترك لشهيته ان تقرر الباقى ... كذلك التحكم فى الاخراج...مرتبط بالاستعداد الجسمانى و النفسى للطفل...مقدرش اتحكم فيه, لكن لو الطفل ابدى عدم استعداد فى وقت معين, يبقى من واجبى اتاكد انه لابس الحفاضة لحد ما يكون مستعد.
ازاى اساعد الطفل يلتزم بالحدود؟
- اخبريه بالحدود مسبقا قدر الامكان.
- خلى نبرة صوتك هادئة و واثقة لان دة بينعكس على احساس الطفل بالامان و الثقة و بيوصل للطفل رسايل " أمى مسيطر على الموقف" " امى لا تشعر بالتهديد من بكائى او نوبات غضبى" " امى قادرة على التعامل مع هذا الجانب منى".
- اوضح الحدود و القواعد باسلوب فيه احترام كامل للطفل و شرح قصير لسبب القاعدة التى اطالبه بالالتزام بها ....شرح قصير, مش محاضرة و لا محايلة.
- احيانا بيكون لازم اخد بايد الطفل برفق و اساعده على الالتزام لان الكلام لوحد بيكون غير كافى.
- اثبتى على موقفك كل مرة, لا تتراجعى عن موقفك بسبب رد الفعل الانفعالى للطفل تجاه تمسكنا بالحدود, يعنى مش عشان خايفة من بكاؤه او نوبات غضبه لكن ممكن تتراجعى بسسب انك فكرتى و اعدتى النظر فى الامر ...و ساعتها تكونى صريحة مع الطفل " انا كنت قلت كذا, بس انا فكرت و لقيت انك ممكن تعمل كذا " , دة بيورى للطفل نموذج للمرونة فى التفكير و التواصل الصريح.
- تمسكنا بالحدود فى وجه طفل "مقريف" احيانا بيكون فرصة رائعة له للتفريغ العاطفى. و دة الى حصل لما ابنى ادم ابنى رجع مقريف من الحضانة على غير عادته و ابتدى يطلب اشياء يعلم انها غير مقبولة بالنسبة لى. شعرت انه يبحث عن فرصة للتفريغ و تمسكت بالحدود و لم اخشى ردة فعله...ادم بكى لمدة 10 دقائق ..و بعدين جه فى حضنى و هدى...ثم بدا يضحك و يلعب كعادته بعد ان حصل على فرصته كاملة للتفريغ العاطفى. بعد ان هدأ سالته اذا كان فيه شئ ضايقه فى الحضانة و اعتذرت له ان كان بدر منى شئ غصب عنى سبب له هذا الضيق و اخبرته انى احبه.
و اخيرا, متخفيش تقومى بدورك مع ابنك ك "قائد" له, مفيش حاجة اسمها انا هاربى ابنى على الحرية فاسيب الطفل يعمل الى هو عايزه, دى مسمهاش تربية ...حتى لو بدا ليكى ان دة الى الطفل عايزه want , فمش دة الى هو محتاجه منك need
There is a difference between a need and a want
و للحديث بقية ان شاء الله
ليست هناك تعليقات:
إرسال تعليق