ولادة آدم (1) ~ الولادة الطبيعية

آدم اول ما اتولد

الحقيقة ان ولادة آدم مكنتش قيصرية, لكن كمان مكنتش ولادة طبيعية. دى مش فزورة و لا حاجة. الموضوع هو ان تعريف الولادة الطبيعية الى أقصدها هى الولادة بدون تدخل جراحى, طلق صناعى أو بنج. ودة لان كل الحاجات دى بتمنع أو بتقلل استجابة الجسم الطبيعية اثناء عملية الولادة بافراز هرمون الاوكسيتوسين والى بيكون فى اعلى معدلاته  بعد الولادة الطبيعية (خلال أول ساعة, خاصة لو الأم رضعت طفلها فى الوقت دة) و بيلعب دور مهم جدا فى الارتباط النفسى بين الأم و طفلها و كمان بيساعد على الرضاعة الطبيعية.
الى حصل انى ولدت آدم ببنج كلى و طلق صناعى و دة لان الدكتورة قررت فجأة انها هتقلبها قيصرى لكن ملحقتش (لان آدم استعجل ونزل), وبعد ما فقت من البنج ملقتش آدم و مشفتوش غير بعدها بساعة او اكتر من الولادة.
و بغض النظر اذا كان قرار الدكتورة انها تقلبها قيصرية بعد ما كنت داخلة اولد طبيعى كان قرار فى محله و لا لأ, لكن الحاجة الى عايزة اتكلم عنها هو احساسى بعد ما صحيت من البنج و سبت العمليات و رحت غرفة عادية, حسيت انى اتحرمت من تجربة كان لازم اعيشها واحسها, كان لازم احس بآدم و هو بيخرج للدنيا, كان لازم اسمع صوت عياطه اول ما اتولد, كان لازم اخده فى حضنى و اطبب عليه واطمنه, كان لازم يسمع صوتى و يشم ريحتى, و كان لازم كمان ارضعه . . . . لكن للاسف اتحرمت من كل دة, اتحرمت من الجانب النفسى لعملية الولادة الى ربنا صممه بابداع و احنا بجهلنا بنفسده.
الولادة القيصرية و الطلق الصناعى ليهم حالات بيكونو ضرورة فيها, و رغم ان منظمة الصحة قالت ان الحالات دى المفروض تكون من 10 ل 15% فقط, الا ان معدل الولادات القيصرية زاد بشكل غير مسبوق فى مصر ودة بسبب استسهال الدكاترة واحيانا الامهات للأسف.